पूर्व पश्चिम राजमार्ग अन्तर्गत रौतहटको धन्सर पुल नजिकै आज बिहान भएको सवारी दुर्घटनामा एक जनाको मृत्यु भएको छ भने दुर्घटनामा सात जना घाइते भएका छन् ।

विराटनगरबाट काठमाण्डौं आउँदै गरेको ना ५ ख २७२ नम्बरको अग्नी यातायातको यात्रुबाहक बसले रोकिराखेको ना ४ ख १०५९ नम्बरको ट्रकलाई ठक्कर दिदा उक्त दुर्घटना भएको ईलाका प्रहरी कार्यालय चन्द्रनिगाहपुरले जनाएको छ । तीब्र गतिमा रहेको अग्नि यातायातको बसले ठक्कर दिँदा सोहि बसका यात्रु रामेछाप चिसापानी २ की २७ वर्षकी मिना तामाङको मृत्यु भएको छ । गम्भीर घाईते भएकी तामाङ्गको उपचारका क्रममा मृत्यु भएको हो ।

उक्त दुर्घटनामा परि झापाका ३२ वषिर्य गणेश पंडित, सुनसरी इटहरीका ४५ वषिर्य मलिन्द्र पोखरेल, हरी बास्कोटा गम्भीर घाइते भएका छन । गम्भीर घाइते मध्ये पंडित र बास्कोटा दुई जनालाई थप उपचारको लागी हेटौडा ल्याइएको छ भने पोखरेलको बारा स्थित निजगढमा उपचार भइरहेको छ । सामान्य घाइते भएका अन्य चार जनालाई चपुर अस्पतालमा उपचारका लागि लागिएको छ । उक्त बसमा ग्यासका सिलिण्डर र भारी मात्रामा पेट्रोलियम पदार्थ समेत रहेको छ ।